保頓格食格見鵲心喜

猪拉多纳

26/12/2011
文： 樂比堅尼

先講保頓主場對紐卡素，保頓今季可用災難嚟形容，踢咗十七輪僅得十二分排尾二，幸好佢哋上場生死戰作客布力般流浪贏二比一，大大振奮球隊士氣，今仗對嚴重跌Watt嘅「喜鵲」紐卡素，有力延續強勢，平手盤捧得過。（有線203及303台周一晚11時直播）




保頓今季成績咁差，主要原因係防線大穿窿，佢哋係目前英超失波最多球隊，平均每場失兩球以上，真係可以用恐怖嚟形容。本來領隊奧雲高尼一向崇尚進攻踢法，但由於佢帥位隨時不保，近期喺戰術上已作出妥協，派出梅姆巴、麥克戴維斯同埋李奧曲卡「三防中」陣式，希望加強防守力，初步睇呢個戰術係成功嘅。


紐卡素冇起色


紐卡素經過季初一輪虛火後，近期已打回原形，近六場未贏過，主要原因係早前催谷得太盡，現階段狀態難免回落，其次係中堅史提芬泰萊長抖，米克威廉臣亦有傷，搞到大後備白治大出洋相，呢個係「喜鵲」死穴，若果佢哋唔喺轉會窗重開後買人，相信紐卡素下半季好難再踢番出季初水平。




平心而論，保頓同紐卡素兩隊實力半斤八両，如果睇對賽往績，保頓近六季主場對紐卡素贏五次，唯一一次贏唔到係當年「大Sam」倒戈執教紐卡素先有此佳績，所以呢個對碰絕對係格食格，難得紐卡素處於低潮，平手盤捧保頓相當抵玩。