巴塞B隊照炒賀斯比圖勒

猪拉多纳

22/12/2011
文： 走肖

西班牙盃第4圈次回合又有直播睇，巴塞隆拿主場對賀斯比圖勒，「-2」不妨照追「讓球主勝」。雖然巴塞捧咗世冠盃後，大批主力獲准提早放假過聖誕，不過巴塞B隊出名係青訓寶庫，加上教頭哥迪奧拿恨捧西班牙盃，對住丙組仔賀斯比圖勒夠炒有餘！（now632台周五清晨5:00直播）

兩回合至少1場大勝

巴塞喺世冠盃決賽KO山度士，教練哥迪奧拿好識做，批准美斯、阿歷斯山齊士、施度基達、馬斯真蘭奴、丹尼爾同艾迪安奴提早放假，不過咪以為佢哋唔重視西班牙盃，查實首回合巴塞贏賀斯比圖勒1:0，哥迪奧拿夾硬要韋拿、沙維、恩尼斯達同碧基延遲出發踢國際賽幫手，好明顯唔想隻盃再落入皇馬手中。


首回合強陣贏得1球，今次仲有韋拿重傷長抖，咁係咪好難贏得多呢？未必喎，事關巴塞上屆得亞軍，除咗喺16強對畢爾包同決賽對皇馬，其餘3圈對施奧達、貝迪斯同艾美利亞，兩回合中總有1場至少贏4球，對住丙組仔唔似會連續兩回合衰畀人睇，就當支持巴塞優質青訓產品，一於追「讓球主勝」。

西班牙盃賽制

今輪為第4圈賽事，若兩回合計總比數打和，採作客入球優惠，若再和則加時30分鐘，加時若仍未分出高下，則互射12碼決勝。

葡萄牙盃、荷蘭盃賽制

均以一場過淘汰形式分勝負，若在90分鐘內打成平手，則需加時30分鐘，再和則互射12碼決勝。