車仔守「細」波士哥唔慌多

猪拉多纳

22/12/2011
文： 阿占

今晚食完冬至飯後抖一抖，就有獨腳戲熱刺主場迎戰車路士嘅倫敦打吡壓軸。兩隊本來可以話五五波，點知英國傳媒話熱刺今場好大機會冇咗艾朗連儂同加里夫巴利呢對快翼，冇咗翼嘅雀仔會點？之唔係飛唔起囉！熱刺進攻隨時癱瘓，對住近排玩保守嘅車仔，隨時悶戰一場，1.95倍入球細值得一試！（有線200、300及廣東體育周五凌晨4:00直播）


今季英超爭標認真好睇，早前有報道仲話形成一個食物鏈，一隊剋死一隊，所以邊隊最後可以攞冠軍，真係好睇前6球隊互對嘅成績，就好似今晚熱刺對車路士咁。

連儂唔踢得 巴利一半半

阿占一向欣賞熱刺，特別係條黃金中場線，堪稱「Big6」中最強，可惜熱刺近排行衰運，上場對新特蘭前，先有左翼加里夫巴利拗柴，喺對「黑貓」一仗中，再有右翼艾朗連儂腿筋撕裂傷出，難怪最後只僅勝對手1:0。賽前熱刺已證實艾朗連儂今晚肯定唔出得，巴利仔上陣機會亦一半半，假如真係冇咗呢對快翼，影響都咪話唔大，須知熱刺今季好多入波，都係靠佢兩個喺邊線策動㗎！


車路士今季初對親「Big6」球隊都冇運行，早前已成功破宿命擊敗曼城，本來重燃爭標希望，點知領隊保亞斯呢個時候先玩龜縮，上場作客韋根喺領先一粒優勢之下，竟然不停換走進攻主力，搞到「藍戰士」臨尾香被逼和1:1，今晚作客實力更強嘅熱刺，試問點會突然玩番進取？再加上保亞斯賽前透露上場對韋根因傷缺陣嘅中場拉美利斯同中堅大衞雷斯都已傷愈，又堅持要泰利負傷上陣鎮守後防，遇着鋒力大減嘅熱刺，真係隨時窿窿完場都唔奇！


頂占筍盤：熱刺（入球細）

有線球彩台主持阿占

電郵：soccer64@cabletv.com.hk 

PHONE波熱線：1831 678

「球彩俱樂部」開放時間：周四晚10:30至11:45