阿德萊德聯反咬悉尼

猪拉多纳

22/12/2011
文： 樂比堅尼

今日冬至相信唔少朋友都有得收早，應該趕得切返屋企睇澳職直播，FC悉尼主場對阿德萊德聯，阿德萊德聯上場榜末大戰不敵黃金海岸聯後，教練古倫終被落鑊，由前FC悉尼主帥高斯米拿執教，今場正好向舊主還以顏色，捧「讓球客勝」！


（有線64及204台周四下午4時30分直播）


阿德萊德聯上季常規賽仲排第三，但今季竟淪落到尾二！大家唔使驚訝，呢個就係澳職嘅特色，威完一季之後，第二季可以完全走晒樣。

新帥效應受讓值博

不過大家又唔使對阿德萊德聯太絕望，因為換咗教練之後隨時可起死回生，畢竟阿德人腳唔曳，只要執番好隊波，同班球員做吓心理輔導，下半季仲有機會反彈！


雖然新任教頭高斯米拿唔係咩名帥，但佢有兩大優勢，首先係德高望重，佢係七、八十年代澳洲殿堂級人物，曾代表國家隊六十次，球隊上下都好尊重佢，另一優勢係佢○七至○九年執教過FC悉尼，對敵方球員踢法相當了解，即使FC悉尼今季演出穩定，阿德萊德聯喺新帥效應下，相信會踢高幾班波，受讓值得捧場。