熱刺 平手盤報佳音

猪拉多纳

22/12/2011
文： 樂比堅尼

今晚英超上演倫敦打吡戰，熱刺主場對車路士，今場亦係英超「三哥」之爭，輸波一隊要爭逐聯賽冠軍相當困難。車路士今季失去霸氣，除「符碌」擊敗曼城外，對其他強隊輸多贏少，加上熱刺於白鹿徑球場一向唔赦車仔，臨近聖誕呢架「鹿車」肯定更勁抽，平手盤可望撞散車仔！


（有線200台及300台周五凌晨4時直播）


未講波之前先交代一吓熱刺嘅負面消息，三隻快馬迪科爾、加里夫巴利同埋艾朗連儂均有傷，其中艾朗連儂肯定缺陣，前兩者則唔太樂觀，球迷要有定心理準備，不過樂比仔對熱刺今季嘅板櫈深度頗有信心，前線嘅艾迪巴約同埋雲達華治都有獨自搵食嘅本錢，加上中場有柏加、莫迪歷、卡蘭積卡、丹尼路斯等具質素嘅球員，即使變陣出擊影響亦唔大。

車仔壞偈靠唔住

反觀車路士近期表現依然飄忽，當所有人以為佢哋三連勝狀態回勇後，上仗卻被韋根完場前逼和一比一，爭標機會大受打擊，睇番車仔今季作客成績其實相當曳，聯賽及盃賽加埋踢咗十二場，勝率僅得三成三，加上近五次聯賽作客白鹿徑未贏過，僅得二和三負劣績，你話熱刺平手盤係咪好抵玩先？


事實上，車路士今季對強隊嘅成績真係不敢恭維，兩對利物浦、阿仙奴同埋曼聯都輸波，雖然佢哋月中曾反勝曼城二比一，但如果唔係踢多一人，加上球證嘅判決受爭議，車仔贏唔贏到都成疑問。


樂比仔認為今時今日熱刺同車仔已處於同一檔次，論穩定性而言，熱刺甚至略高於車仔，所以熱刺今仗主場平手盤唔使多諗，一於向主隊投信任一票！