熱刺「大」炒沙姆洛克

猪拉多纳

15/12/2011
文： 走肖

歐霸盃A組今晚上演煞科日賽事，愛超球隊沙姆洛克流浪喺主場迎戰英超熱刺，入球大最抵玩，因為呢場係沙姆洛克教頭米高奧尼爾告別戰，難免想入波挽回尊嚴，撞啱熱刺瀕臨出局邊緣，最低限度要大勝至有機會奇迹出線，咁嘅情況梗係買定薯片等睇入球騷啦！（有線61及201周五凌晨2:00直播）




沙姆洛克流浪出戰歐霸盃淪為炮灰，目前5戰全敗篤定包尾出局，入4球、失15球，由於後防易散過豆腐，所以5場分組賽全部開入球大。不過咁，沙姆洛克教頭米高奧尼爾同球會傾唔掂數，預定帶埋呢場講再見，有理由相信，米高奧尼爾會吩咐球員踢得好好睇睇，務求能夠英雄式告別。




此外，沙姆洛克射手加利泰域好早已經決定離隊，嚟緊1月跳槽去基爾馬諾克，臨別在即，相信佢都希望呢場入番球送畀球迷做紀念，同樣有利開入球大。


出線要贏波兼追得失球差


熱刺方面，形勢上佢哋除咗要贏波，仲要寄望PAOK砌低魯賓卡山，原本已經難出線，最弊係熱刺同魯賓卡山得失球差有5球差距，唔入波點得？正因為咁，今季當歐霸盃玩泥沙嘅熱刺，就算繼續派出大批副選應戰，照計心態上都會好想入波。




更何況，迪科爾預咗1月要走人，難得今場有機會擔正入波騷哥利，佢應該唔會令未來東家失望，加上熱刺副選陣容默契唔夠，容易走甩對手失波，正式係入得又失得，買入球大就最穩陣。