博洛復甦主場攞A

猪拉多纳

11/12/2011
文： 巨高

周日意甲直播賽事博洛尼亞主場對ＡＣ米蘭，無論對賽往績及實力，ＡＣ米蘭都高過博洛尼亞，但今場巨高想拗吓頸，推介博洛尼亞畀大家。其實呢支下游球隊已漸入佳境，相信有主場之利可抵住ＡＣ來犯，ＡＣ作客要讓波，可取「讓球主勝」。（now 633及660周日晚10時直播）




ＡＣ米蘭今場最大問題係傷兵多，除咗加度素、卡斯辛奴及法米尼要長抖之外，首席門將艾比亞迪、中堅尼斯達以及今季大熟大勇嘅洛斯連奴都因傷唔出得，陣容不整一定影響到發揮。


ＡＣ殘陣作客難靠


再講，今季ＡＣ喺意甲作客所取得嘅三勝都欠信服力，較早前對羅馬及萊切都只係以一球差距勝出。另一次作客熱拿亞雖然贏兩粒，但對手同ＡＣ關係非比尋常，賽果未能反映出實際情況。就算計埋歐聯作客賽事，ＡＣ對住實力較弱嘅柏辛域陀尼亞及巴迪都贏唔到，今次係咪讓得起博洛尼亞，巨高真係好有保留。




博洛近年所以咁差，全因隔幾個月就話換老闆，過幾個月又話冇糧出，球員又點可能集中精神比賽。博洛今季管理層已見穩定，球員唔使再擔驚受怕，表現自然有改善。連同盃賽及意甲，博洛近四場法定時間90分鐘保持不敗，乘着勇勢，今晚有望喺ＡＣ身上搶分。