馬里奧高美斯倒戈不留情

猪拉多纳

11/12/2011


近兩季進步神速嘅拜仁射手馬里奧高美斯，今仗再一次倒戈迎戰舊主，呢位上季德甲神射手近三場聯賽交白卷，搞到喺射手榜畀史浩克04嘅亨特拉爾爬咗頭，當然急於入波，事實上佢近期喺陣上表現一啲都唔差，只係上場聯賽大勝雲達不來梅之役，球隊第三個入球畀隊友列貝利快一步截胡，其餘兩個十二碼亦因為洛賓搶住射，最終未能請纓立功，冇波入相當唔抵。


上季對舊主共轟四粒


馬里奧高美斯由史特加一手栽培，十七歲開始由二隊踢起，雖然兩季前轉會拜仁，但對母會嘅賽事毫不留情，皆因佢認為轉投拜仁，已經為母會賺得三千萬歐元轉會費，對得住舊主有餘，事實上單計上季，佢兩循環為拜仁對史特加已合共取得四個入球，尤其作客重返平治球場之役更加連中三元，可見史特加主場係佢嘅福地，今晚當然唔會放過數胡機會啦！