阿仙奴食「糖」挑戰前三位

猪拉多纳

10/12/2011
文： 江忠德

曼巿雙雄喺歐聯齊齊玩完，反而車仔同兵工廠高歌猛進，真係連金牌編劇都未必度得出，所以話阿仙奴可以喺年底前飛躍進步，殺入英超前三位，其實又有乜出奇呢？今晚喺主場迎戰「拖肥糖」愛華頓肯定殺無赦！




兵工廠剛啱响最後一輪無關痛癢嘅歐聯分組賽輸波，相信並唔會打擊士氣，加上喺聯賽盃亦已經出局，依家疊埋心水踢英超，反而係一件好事，嚟緊7場波，除咗曼城係硬嘢之外，其他都只係普通貨色，只要醒醒定定，排名肯定仲有得躍升。


熱刺作客難啃史篤城


經歷過季初低潮之後，阿仙奴一眾新兵加上生牯仔逐漸成熟，戰鬥力愈來愈強，以往好有殺傷力嘅整體戰終於重現，當然擔大旗嘅尹佩斯係居功至偉，相信佢見到球會為亨利立像慶祝125周年紀念，肯定會刺激佢入更多波破紀錄，愛華頓後衞見到佢肯定頭痕！




至於周日晚上演嘅史篤城對熱刺，雙方嚟緊周中都要應付歐霸盃，但係史篤城已經出線無後顧之憂，雖然話熱刺唔太吼呢隻盃，但多少都有啲牽掛，遇上兩連勝兼主場惡慣嘅史篤城會好難踢。