華倫軍心崩潰大件事

猪拉多纳

10/12/2011
文： 山度士

曼聯歐聯出局，的確搞到滿地玻璃碎，有邊個諗到紅魔鬼連十六強都入唔到？賽後主力里奧費迪南話，所有球員都好失望，有啲仲瀕臨崩潰邊緣。度士都好明白，輸咗場被全世界睇好嘅賽事已經夠慘，仲要令球會蒙受咁大損失，就算曼聯球員夠晒經驗，都好難面對。




歐聯對頂級球會有幾重要，已經唔使度士再多解釋，雖然打擊不及曼聯大，但華倫西亞於最後一輪比賽作客吞車路士三蛋，最終須轉戰歐霸盃，佢哋都唔好受。事隔三日，華倫喺周日凌晨於西甲作客貝迪斯，雖然牌面、人腳秤先，但現時士氣低落，體力又不及對手，作客讓平半有暗湧。




華倫上盤買唔過，但貝迪斯亦唔爭氣，近十戰竟然一和九負，成班波好似食咗瀉藥一樣。前一場主場鬥皇家蘇斯達，完場前五分鐘曾一度追成二比二，點知最後畀恩尼高馬天尼斯一個超遠射搞掂，真係點踢都要輸，咁嘅腳風下盤亦完全唔穩陣。


6鬥貝迪斯全開大


既然係咁，不如轉諗大盤！貝迪斯戰績係曳，但近兩場射入三球，球隊已打破入球荒，主場出擊肯定盡谷求勝；華倫攻力不俗，入球數字僅不及巴塞、皇馬排聯賽第三，前鋒蘇爾達杜近五仗入六球，近五場都開大。對賽方面，雙方近六次交手亦未開過細，今戰大盤有2.05倍抵玩。（now 632周日凌晨3時直播）




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。