紅魔踢守細波

猪拉多纳

07/12/2011
文： Mic少

C組曼聯今屆歐聯明顯缺乏霸氣，射手查維亞靴南迪斯受傷倦勤，朗尼陷入球荒，加上和波就可以出線，領隊費格遜咁精明自然識計數，到訪瑞士首要工作係做好防務，引巴素利推前搶攻然後施以突擊，預料紅魔鬼最多只係小勝，讓半一隨時贏得半個盤，不如揀2倍入球細更划算。（有線61及201台周四凌晨3時45分直播）


雖然曼聯分組賽仍不敗，但兩場勝仗都只係小勝魚腩加拉治二比○，呢種疲弱演出已持續一段長時間，今仗勢難突發威大炒對手。事實上，紅魔鬼亦冇必要大勝，畢竟和波就可以出線，尤其係首循環被巴素利攻入三球幾乎輸波，費Sir肯定加強警惕，唔會再犯同樣錯誤。

鋒線態沉守強於攻

紅魔鬼進攻方面缺少查維亞靴南迪斯，而朗尼近七次上陣都冇波入，腳風非常唔順，加上貝碧托夫冇隨隊，曼聯入波能力實在令人懷疑。


至於巴素利要出線則非勝不可，但佢哋始終質素有限，而且首循環帶隊到奧脫福踢出代表作嘅教練芬克已轉投漢堡，現時只係由助教禾高領軍，呢位三十六歲少帥教波功力點能夠同費Sir相提並論？