桑坦德做東炸沉黃色潛艇

猪拉多纳

03/12/2011
文： 鄭少偉

冷鋒殺到，大家出街記得着多件衫唔好冷親吖！啱啱過去個星期有唔少意外賽果，冷味十足非常應景，「亨利」今晚就伺機扒冷，博桑坦德主場擊敗傷兵滿營嘅維拉利爾反彈，搵番餐邊爐錢！（開賽時間：周日凌晨1:00）




踏入12月，球季差唔多打到一半，好多球會要應付歐洲賽事同各項盃賽，差唔多連續2個月都一周雙賽，如果班波實力雄厚、兵源充足，可以行輪換制當然無問題啦，但對於好多資源短缺嘅中小型班嚟講，就同雪上加霜冇分別。


維拉利爾傷兵滿營


「黃色潛艇」上季打生打死拎到張歐聯入場券，以為多條財路今季都會精精神神吖，點知多條戰線仲弊，季初高價賣走咗國腳辛迪卡索拉，換嚟幾件級數爭成班嘅約拿芬迪根斯文同沙柏達華倫西亞返嚟，當然帶唔起隊波，而最值租嘅「攻擊鐵三角」尼爾馬、基奧斯比羅斯同卡尼先後受傷，搞到依家淪落到喺中游掙扎。兵源本身唔多，仲要傷多幾件，焗住喺預備組提升啲小朋友上嚟，咁嘅環境真係唔好掂佢哋住喎！




喺西甲排包尾嘅桑坦德啱啱同教頭古柏分手，對班波嚟講未必係壞事，至少班球員為咗留個好印象畀未來波士睇，今日主場面對殘兵維拉利爾，隨時會拚埋條老命贏波？平手盤捧硬桑坦德！