史特加「大」得起不來梅

猪拉多纳

27/11/2011
文： 鄭少偉

「亨利」成日同大家傾意甲同西甲，英超都講過，反而德甲就係第一次。平時聽到唔少波友講，德國波利開大，其中一個原因係德甲球隊好多都係攻強於守，好似今晚雲達不來梅主場對史特加咁，兩軍中前場人腳鬼咁好，捧1.55倍入球大之餘，博埋狀態較好嘅史特加客W啦！（有線61、64、201及204周日晚10:30直播）


不來梅殘陣勁跌Watt


不來梅季初上過積分榜第2位，「亨利」仲以為佢哋「返番嚟」，點知德甲未歇冬，佢哋已經跌晒Watt。睇番不來梅嘅表現，其實都好倚賴前鋒比沙路，咪以為呢位老將年屆33就唔掂，查實佢今季已經入咗11球，喺射手榜排第3位。不過，不來梅賽前突然傳出比沙路有傷，今仗最多只係紮住上，前德國國腳保路斯基又打柴，要用雪櫃兵馬高馬連同質素差一截嘅肯特（下圖）擔正，真係好難畀到人信心喎！




「亨利」一向都好留意同支持喺歐洲搵食嘅亞洲球員，史特加陣中嘅日本國腳岡崎慎司，就係其中一位。「亨利」有好多朋友都好鍾意岡崎嘅踢法，球味十足，喺禁區內捕位一流，態度又勁認真，今季已經為史特加入咗3個波，仲要建功嗰3場波全部贏晒添，名副其實係「福星」。再講，史特加前場仲有卡卡奧同夏歷，鋒力勁爆，今仗有機會上演「大」屠殺，博個3.05倍客W，力撐埋個入球大，博雙贏啦！