比拿美搵文仙尼算帳

猪拉多纳

27/11/2011


今仗倒戈曼城，對利物浦前鋒比拿美意義重大。文仙尼執教曼城後，比拿美曾同文帥就傷患問題爆發激烈衝突，之後文帥就當比拿美係垃圾，將佢掟落預備組，並借佢到英冠卡迪夫城。呢名「老來嬌」本季於紅軍重生，今仗必向仇人報復！


高爾勸安祖卡路爾聽話


艾迪巴約曾講過：「文仙尼就係我同比拿美嘅噩夢。」可知比、文二人過節極深。今年八月，文帥表明比拿美於曼城「冇將來」，唔會畀佢於英超上陣一分鐘。此地不留人、自有留人處，比拿美於利物浦大打爭氣波，上仗擊敗車路士，佢就係贏波功臣之一。今次兩個死敵正面對撼，文帥賽前雖然話同比拿美關係冇問題，但比拿美肯定唔放過無情舊主！




此外，上季轟入兩粒、領利物浦贈曼城三蛋嘅安祖卡路爾，現時正選不保，其紐卡素前輩高爾叫佢乖乖聽杜格利殊話：「我都後生過，亦曾自大過，如果卡路爾繼續唔改善態度，好快玩完。」