主帥嗌走飛腳凍過水

猪拉多纳

24/11/2011

大阪飛腳主帥西野朗離隊損士氣！臨近賽季結束，日本球圈突然傳出大阪飛腳主帥西野朗將於季尾離隊消息，佢日前亦證實教埋今季會走人，嚴重影響球隊士氣，大軍上場力戰失分，現時爭標形勢惡劣，西野朗肯定要孭鑊。

西野朗事先張揚唔續約

去到爭標最後關頭，飛腳教頭西野朗忽然被爆唔會同球隊續約，經過傳媒多番追問，佢終於提前公布離隊消息：「同會方洽談後，我決定唔續約，經過考慮之後，都係決定提早公布。」


西野朗行事一向穩當，但明知換帥消息有損士氣，仍然唔封口講咁多嘢，搞到軍心大亂。飛腳上仗喺關鍵戰役作客新潟天鵝，雖憑小將川西翔太梅開二度逼和對手，但已落後柏雷素爾四分，後上奪冠需要奇迹，西野朗喺關鍵時刻搞搞震，睇怕都會成為箭靶。