主場硬淨防線一流 地膽辛尼特請食魚生粥

猪拉多纳

23/11/2011
文： 查理阿蛋

今晚歐聯G組辛尼特主場迎戰尼科西亞，4戰不敗嘅尼科西亞只要贏波，就可以締造歷史成為首支躋身歐聯16強嘅塞浦路斯球隊，不過小妹睇好主場硬淨嘅辛尼特可以小勝做攔路虎，博3.35倍「讓和」。（有線61、64 、201、204及中央5台周四凌晨1:00直播）

尼科西亞作客慣輸1球

話辛尼特坐擁「地獄主場」絕不為過，除咗球迷打氣聲震耳欲聾外，佢哋近10次主場取得7勝3和僅失2球，防線硬淨到暈，仲試過喺歐聯連挫波圖及薩克達，相當Sharp醒。辛尼特喺上仗俄超主場迎戰有伊度奧壓陣嘅安治雖然互交白卷，不過整體表現極佳，教頭史巴列堤更大讚箭頭布卡洛夫「着晒火」！布卡洛夫上仗未能取得「士哥」，今晚必定拎尼科西亞祭旗，一報首循環輸1:2之仇。


對家尼科西亞作客成績唔曳，10戰5勝3和2負失5球，2場敗仗都只輸1球，可惜辛尼特主場威力太強，尼科西亞想歷史性進身16強，睇怕要等多場喇。