多蒙特爆「廠」演入球騷

猪拉多纳

23/11/2011
文： 亨格比利

大家都係出閘脫腳，最近又係齊齊重返正軌，阿仙奴同多蒙特兩支復甦勁旅，今晚會喺歐聯F組再次交手。「蜜蜂兵團」為保出線希望，作客情況都焗住要踢得主動，撞正有弗爆射手尹佩斯壓陣嘅「兵工廠」，當然捧1.85倍大啦！（有線64及204周四凌晨3:45直播）


先講F組形勢，榜首嘅阿仙奴今仗贏波即可躋身16強，排第3嘅多蒙特要攞3分先可以保住出線希望，多蒙特教練高普賽前話作客都會照攻，畢竟佢哋剛啱先喺聯賽砌低拜仁慕尼黑，全隊上下當然個個心雄。加上羅拔利雲度夫斯基同馬里奧葛斯呢對前線孖寶咁弗，夠晒本錢同阿仙奴駁火。

尹佩斯近8戰入10球

「兵工廠」近8仗贏咗7場，當中荷蘭射手尹佩斯就狂省10粒，今鋪對住續有蘇保迪因面部受傷缺陣嘅「蜜蜂兵團」防線，隨時又係佢嘅Show Time。不過阿仙奴傷兵問題仍然嚴重，計落就有沙格拿、韋舒亞同戴亞比等十字軍，領隊雲格為專心喺聯賽力爭上游，當然想盡快攞到歐聯16強出線資格以免夜長夢多，預期雙方今戰都會踢得進取，入球又點會少吖！