士砵亭喪攻「大」無畏

猪拉多纳

20/11/2011
文： 力奇

葡萄牙盃第4圈今晚有場重量級大戰，由士砵亭主場迎戰布拉加，力奇認為2.02倍入球大有得諗。事關主隊近排大鬧後衞荒，焗住以攻為守，加上兩班波近年喺阿爾瓦拉德球場交手例牌多波入，呢場入球騷點可以錯過？（開賽時間：周一凌晨4:15）




士砵亭近12戰竟然取得11勝1負，不過防線始終備受批評，兩個被寄予厚望嘅外援安恩胡同恩素亞受到傷患困擾齊齊缺陣，最慘係個十字兵陣營，仲包括埋阿拔圖洛迪古斯、安達臣普加同丹尼爾卡列高幾名守將，搞到領隊杜明高斯要將左閘艾華度移入中路勉強頂住。唯一值得慶幸，係智利中場馬迪亞斯費南迪斯及時傷愈復出，加上射手雲禾夫斯雲高同舒赫斯、謝法倫組成嘅進攻鐵三角夠堅，可望以攻代守。


同布拉加交手例多波入


布拉加呢邊，聯賽10戰入13球火力唔算勁，但睇番佢哋喺歐霸盃，都試過作客大炒馬里博爾同伯明翰，由洛迪高利馬同老將紐奴高美斯組成嘅鋒線都有一定入球能力。仲有值得一提，布拉加近6次出訪士砵亭，有5次開出入球大，次次搏錘，今鋪追大應該搵到食。


葡盃賽制：


今輪為第4圈，以一場過分勝負，若法定時間內打成平手，需加時作賽，再和則互射12碼決勝。