智大沙兵大晒冷

猪拉多纳

17/11/2011
文： Mic少

南球盃八強次回合，智利大學主場對沙蘭迪兵工廠，「智大」首回合贏二比一，晉級前路佔先機，以佢哋目前勇態，應會乘勢爭取喺球迷前再下一城。不過沙蘭迪兵工廠亦唔會坐以待斃，相信會豁出去，博反敗為勝，預料會出現鬥攻場面，捧入球大。




（周五早上8時45分開賽）




「智大」今季表現持續大勇，聯賽遙遙領先之餘，踢南球盃由第一圈開始，七戰取得六勝一和，只失一球，包括「雙殺」巴西勁旅法林明高，可見「智大」即使有領先優勢，亦唔會留力。事實上，「智大」現時只有一球領先優勢，唔算太安全，今仗有地利，應會主攻爭取盡早奠定勝局。以「智大」近三仗共入九球嘅火力，要撕開客軍防線，並不困難。


「沙兵」喪攻博反勝


至於沙蘭迪兵工廠輸一球又係輸，輸十球又係輸，應會豁出去盡地一煲，希望可以收復失地。其實「沙兵」首回合表現唔錯，但比賽末段失一球十二碼，導致敗陣，球員難免深深不忿，報仇決心必然更大，踢法應會傾向進取，有利製造入球。今仗如果兩回合總比數打和，先計作客入球，若作客入球數字相同，則直接互射十二碼分勝負。