查爾頓爭升班唔吼足總盃

猪拉多纳

13/11/2011
文： 自由恒

早年嘅英格蘭足總盃直播係由第3圈開始，皆因英超球隊喺嗰圈開始加入，但近年直播愈來愈濫，連第1圈都有得睇，仲要有高清添。過往首圈撞正幾場大波，完全諗唔到理由睇低組別球隊混戰，只不過今次撞正國際賽期空檔，令今晚嗰兩場足總盃直播就變得特別矜貴。

夏利法斯城近6戰5勝

有份參戰首圈足總盃嘅球隊，都幾可肯定同獎盃無緣，有心過捧盃癮嘅都會向專為低組別球隊而設嘅盃賽進軍，所以爭緊升班又或者護級嘅球隊，踢足總盃都選擇早走早着，好似上季英甲冠軍白禮頓，喺上屆足總盃首圈面對非聯賽球隊一樣贏唔到，就知排名高唔一定係優勢。


今晚來自非聯賽嘅夏利法斯城，就會喺主場越3級挑戰英甲榜首球隊查爾頓，客軍聯賽戰績雖然突出，但盃賽就認真唔掂，英錦一出場就出局，英聯盃亦只係踢到第2圈就畢業，點都睇唔出有心爭足總盃，今仗作客近6戰贏5場嘅夏利法斯城，寧取2.85倍「讓球主勝」。（now670台周日晚8:30直播）

英格蘭足總盃賽制：

今輪為第一圈，打和需擇日重賽，重賽打和需加時作賽，再和則互射12碼決勝。