銀河攻「城」爭做西岸之王

猪拉多纳

06/11/2011
文： 力奇

美職季後賽聽朝分別上演東、西岸決賽，其中由碧咸帶領嘅洛杉磯銀河，會喺西岸決賽火併皇家鹽湖城。銀河之前喺主場累積10連勝，碧咸又想捧盃告別美職，1.62倍主勝值得捧場。（now633及660台周一早上10:00直播）




話碧咸想奪標告別唔係講笑，力奇睇番上輪佢哋對住紐約紅牛，「萬人迷」雖然全場畀對手踢到飛起，但一樣打甩門牙帶血吞，依然搏盡老命，結果銀河喺先失一球下，憑佢嘅角球助攻加上完場前15分鐘博得12碼，反勝紅牛2:1，兩回合計就贏埋3:1殺入決賽。除咗碧咸有料到之外，兩大射手當路雲、馬基同守將杜尼雲特近期都有上佳水準，演出大獲好評。最緊要係巴西中場重心祖連奴又刑滿復出，強陣出擊，要贏波自然話咁易啦！




鹽湖城近5次作客1和4負




鹽湖城呢邊，上一圈淘汰西雅圖海灣者都算有運，主場贏完3:0，作客就輸番2粒，仲要係次回合全場捱打，其中上半場射門已經係1對15。話就話佢哋今仗會有雙中堅奧拿夫同波查斯復出，但睇番佢哋客場已經連續5場未贏過，仲係1和4負，今次去到洛杉磯睇怕凶多吉少。


美職季後賽賽制


今輪為東、西岸決賽，以一場過分勝負，若法定時間內打成平手，則需加時作賽，再和則互射12碼決勝。