緬恩斯態沉撐史特加

猪拉多纳

04/11/2011
文： 朱楓

今晚德甲上演獨腳戲，由緬恩斯主場對史特加。兩隊今季戰績一隊天一隊地，喺天嘅史特加上場逼和多蒙特後，士氣同信心大振，相反緬恩斯就愈踢愈沉9戰不勝，但教練杜捷爾仍然話會堅持踢「漂亮足球」，咁同送死根本冇咩分別，平手盤我捧客軍！（有線61及201周六凌晨3:30直播）


上季排第5嘅緬恩斯，今季開頭係威係勢取得兩連勝，點知喺第3周主場領先2球下，最後以2:4不敵史浩克後就一沉不起，上周主場倒輸畀雲達不來梅1:3後，喺聯賽已累積9場不勝。

9戰不勝教頭未知衰

其實緬恩斯近排成日輸波失分，全因教練杜捷爾喺舒賀爾尼等多名主力離隊後，仲堅持用上季套「漂亮足球」戰術，不過杜捷爾仲未知衰，日前表示唔會改變原則，死撐呢套戰術基礎上根本冇問題，只係球員欠信心以致成績先咁差，擺明喺度卸膊。

史特加信心士氣爆棚

同緬恩斯相反，史特加今季表現神勇，上仗主場仲成功逼和衞冕嘅多蒙特，賽後教練拉巴迪亞大讚球隊踢出今季代表作，無論心理同戰術上都冇得頂，分工又鮮明，話班波只要攞多啲控球權，減少無謂失誤，有信心今場可以贏緬恩斯。事實上，史特加班球員近排士氣真係幾好，早幾日放假，好多球員帶埋屋企人行街享受陽光，前鋒普格恩耶克繼續缺陣又使乜驚！