銀河騎牛牛有仇報仇

猪拉多纳

03/11/2011
文： 查理阿蛋

聽朝美職季後賽西岸四強次回合，有洛杉磯銀河主場迎戰紐約紅牛，兩隊喺首回合爆發衝突，恩恩怨怨都係時候解決。小妹決定捧1.62倍主W，支持銀河隊長當路雲同型男碧咸領軍，騎住呢隻作客冇鬼用嘅牛牛。（now633及660台周五早上11:00直播）


首回合大打出手


兩隊波喺萬聖節碰頭時，紅牛喺主場輸波，守將馬基斯唔知係咪輸唔起，喺賽後居然拎波掟銀河隊長當路雲，搞到雙方球員大打出手，最後馬基斯同銀河中場祖連奴雙雙領紅牌，嬲到震嘅當路雲事後大鬧紅牛「冇品」！雙方事隔唔夠一星期再碰頭，有主場之利嘅銀河仲唔趁機喺場上報復咩？




紐約紅牛個名雖然幾有型，但係呢隻牛牛一作客就現晒形，全季作客只係贏過2場，今次惡鬥主場未輸過兼8連勝嘅銀河又點會有好下場？碧咸之前既然扮過真人版白馬王子，今次一於化身鬥牛勇士，騎住牛牛入西岸決賽啦！




美職季後賽賽制：採主客兩回合制，今輪為東、西岸4強次回合，不設作客入球優惠，若總比數相同，將在次回合後加時作賽，再和則互射12碼決勝。