急流「+1」有雞偷

猪拉多纳

02/11/2011
文： 樂比堅尼

樂比仔最鍾意就係玩兩回合嘅賽事，一來首回合有辦睇，二來有啲球隊根本唔需要贏，從投X角度睇好容易搵到水位。好似美職肯薩斯體育會，東岸季後賽四強首回合對科羅拉多急流已贏緊兩粒，次回合返主場迎戰，唔通仲同你水銀瀉地鬥攻咩？急流話晒係衞冕球隊，今場受讓當然捧「讓球客勝」。
（now 633及660周四早上8時直播）

肯薩斯體育會數日前首回合作客以二比○擊敗急流，可以話爆出個小冷門，相信唔少人見佢哋咁勁，連作客都贏得，返主場自然可翻嗒啦！但去到季後賽階段，最緊要就係晉級，過程係點根本一啲都唔重要，否則成季嘅努力就付諸流水，肯薩斯今場戰術簡單不過，就係要保住勝局。講得衰啲，話知今場輸番一粒畀你！


近六交手主勝率低


事實上，兩隊實力非常接近，近六次交手就有三次和波，值得留意係主場一方僅贏過一次，可見呢個Matchup根本就冇主場優勢可言，肯薩斯今場究竟憑乜嘢主勝得1.72倍？連樂比仔都好想知！


衞冕嘅急流今季表現一直好平穩，雖然今仗有泰朗馬素爾停賽，卡斯、卡雷布科蘭、木村宏介及德魯摩亞有傷，但呢隊波向來唔係靠某幾位球員，而且佢哋季後賽經驗遠較對手豐富，今場能否反勝晉級樂比仔唔敢講，但力保不敗甚至贏波真係一啲都唔奇！

另一場西岸四強戰，西雅圖海灣者主場對皇家鹽湖城，鹽湖城首回合領先三球，同一道理，今場捧海灣者啱數！