打比郡筍盤碌卡掃貨

猪拉多纳

02/11/2011
文： 麥馬拿仁

「英冠快車」最後兩仗，打比郡平手盤好路！「綿羊」主場迎卡迪夫城，客軍人腳雖不俗，但作客演出打折扣，連盃賽本季八次作客贏一場，比率僅過一成。打比郡係地頭蟲，目前主場成績高踞聯賽第二位，今戰唔使讓波筍到極！
（周四凌晨3時45分開賽）
論陣容，卡迪夫城的確唔曳，中場有韋定咸及麥法尼坐鎮，但前線太依賴堅尼米拿，周時有支援不足情況，作客踢得保守時更加明顯，七場聯賽作客只入得九球，於季初爆冷擊敗韋斯咸之後近七次作客不勝，作客低組別球隊牛津聯都未能敲響勝鼓。

打比郡早前曾五戰不勝，但不敵實力較佳嘅李斯特城同米杜士堡冇嘢好講，上場返回主場鬥樸茨茅夫半場已領先三球，表現值得讚賞。「綿羊」本季主場聯賽不敗率達八成五，平手盤要得過。


列斯聯「大」戰黑池


另一戰列斯聯主場迎戰黑池，客軍近期沉到爆，上仗輸畀般尼極為難睇，激到領隊荷路維生蝦咁跳。列斯聯主場表現反覆，但勝在攻力強勁，今戰捧大好過。