科隆靠普多斯基再闖關

猪拉多纳

30/10/2011
文： 阿占

現今球壇有錢就連球員忠誠一樣可以買到，不過都有少數例外，科隆前鋒普多斯基就係其中之一，老實講呢位落難王子絕對夠料去最頂級嘅豪門効力，但就偏偏對呢間家鄉球會忠心耿耿，今季仲用火辣表現撐起隊波，今晚科隆喺德甲主場迎戰奧格斯堡，又係時候睇佢表演，阿占撐1.8倍主勝！




（有線61、64、201及204周日晚10:30直播）




科隆整體實力其實一般，今季能夠企穩中游位置，普多斯基真係佔好大功勞，科隆目前15個入波之中，「王子」就佔咗6球，仲交出3次助攻，連教練蘇巴根都忍唔住大讚佢係當今數一數二嘅好波之人！今場普多斯基嘅責任會更加重大，事關摩洛哥前鋒捷希十字韌帶撕裂重傷，坐底要休息半年，好在老將路華高域今季狀態都唔錯，有佢拍住王子，科隆絕對有機會爭取主場3連勝。


奧格斯堡今季德甲僅勝1仗


作客嘅奧格斯堡本身財力有限，升班後人腳同其他德甲球隊有一定距離，開季到依家只贏得一場，跌入降班漩渦完全唔令人意外。據聞佢哋準備再借人救亡，目標包括拜仁慕尼黑嘅日本國腳宇佐美貴史，不過遠水始終救唔到近火，今季10場只入8球，火力係全德甲最差，今場作客科隆難免會被比下去。