國家打吡頹爆國米難敵祖記

猪拉多纳

29/10/2011
文： 查理阿蛋

今晚意甲上演國家打吡，由過氣冠軍國際米蘭迎戰矢志復興嘅祖雲達斯。雖然「斑馬軍團」客戰發揮唔算出色，但小妹相信，佢哋面對死敵國米肯定當決賽咁踢，出盡力全取3分，以顯爭標決心，一於扒冷直取2.8倍客W啦！




（中央5台周日凌晨2:45直播）


祖雲達斯左路超強


祖雲達斯家陣保持不敗高踞榜首，但係班球員並冇因而自滿，中場核心馬治斯奧仲話：「我哋唔可以畀個排名呃到，面對國米一定要保持爭勝心！」馬治斯奧今季喺左中場踢到曉飛，全靠同派路心有靈犀：「我哋成條中場線都相當有默契，派路係一個好易夾嘅球員。」馬治斯奧亦為前線嘅馬特尼提供極多支援，兩位左路球員今季夾埋已攻入7球，可以話係玩晒左邊成條線！




比起鬥志旺盛嘅「斑馬兵」，國米就真係勁唔爭氣，上仗賽和阿特蘭大後，球會主席莫拉堤亦承認射手迪亞高米列圖狀態唔好，中場指揮官史奈達雖然有質素，但係一個人又點頂得住祖記嘅三人中場線？加上門神施薩索拉斯受傷，睇嚟今晚國米真係凶多吉少咯！