不來梅博反彈 喪攻奧格斯堡

猪拉多纳

21/10/2011
文： 朱楓

正所謂知恥近乎勇！為洗脫兩連敗呢個羞家成績，雲達不來梅近日進行地獄式操練，預計今晚喺正選門神韋爾斯復出下，有權反彈作客擊敗奧格斯堡，畢竟對手近期鬧兵荒，1.92倍客W值得秤先！（有線61及201周六凌晨2:30直播）




開季係威係勢嘅不來梅，近況有回落迹象，繼不敵漢諾威後，上仗主場又以0:2輸畀多蒙特。為求重返勝軌，教練舒哈夫近日喺個半小時嘅操練中，要求麾下球員要踢出比賽時嘅強度同速度，仲進行多個陣式同射波練習。


門神韋爾斯刑滿復出


舒哈夫賽前仲宣布停賽3場嘅門神韋爾斯，今仗會再度擔正。對於韋爾斯復出，不來梅一眾戰將都有讚冇彈，其中相隔17個月重新擔正嘅中堅拿杜就話拍番韋爾斯，有信心今晚可保持清白之身，加上前線有比沙路攻堅，就算「壞孩子」阿拿奧杜域繼續停賽，影響都係小兒科啦！


奧堡天殘地缺冇運行


今季新升班嘅奧格斯堡上周1:0擊敗緬恩斯，取得球會史上德甲首場勝利，但其實嗰個入波去到完場前2分鐘先出現，贏得都幾符碌。最慘係奧堡近期飽受傷兵困擾，前鋒奧爾夏、中場尼特真、馬素迪莊、達華達巴西同後衞華希亞治先後打柴，搞到上場對緬恩斯，要搵日本中場細貝萌客串左閘，賽後德國網站《踢球者》話佢只值4分（5分最多，愈低分表現愈好），今次遇着實力高一班嘅不來梅，相信冇再咁好運！