火車頭搶分撞散AEK

猪拉多纳

20/10/2011
文： 蘇斯黑柴

歐洲啱啱入秋，俄羅斯天氣亦開始寒冷，今日預測低至攝氏兩度，對於仍處酷熱天氣嘅南歐球隊實在好難適應。今晚歐霸盃L組，希臘AEK雅典作客莫斯科火車頭唔睇好，黑柴推介「讓球主勝」。（周五凌晨零時開賽）




黑柴前晚睇咗莫斯科中央陸軍主場對土耳其特拉布宗嘅歐聯比賽，特拉布宗上半場踢得相當唔錯，防守嚴密亦有唔少具威脅反擊，但踢到下半場明顯捱唔住寒冷天氣，最終慘吞三蛋。今晚情況相若，莫斯科火車頭喺俄超表現出色，近十一場聯賽不敗，上輪歐霸盃不敵安德列治後已經冇失分空間，今仗主場必搵弱旅AEK雅典祭旗。


古莊臣斷腳缺陣


AEK近況曳，踢咗兩場歐霸盃輸晒，近三場國內聯賽亦只得一勝，今仗更受嚴重傷停問題困擾，除咗已有四至五名主力養傷外，後防大將達拉斯同中場馬高斯更雙雙停賽，冰島國腳箭頭古莊臣啱啱對奧林比亞高斯嘅聯賽大戰勇戰斷腳，今仗焗住用卅七歲嘅老將列比路普路斯掛帥，殘陣作客莫斯科凶多吉少。