德國比利時開大騷

猪拉多纳

11/10/2011


歐國盃外圍賽A組除德國穩奪首名外，次名就係比利時同土耳其之爭，排第2嘅比利時今仗作客德國焗住攻，夾晒主隊嘅進攻型踢法，唔難上演入球騷，1.54倍入球大記得捧場！（now633台及廣東體育周三凌晨1:00直播）




德國領隊勒夫賽前話明會爭取10連勝完美出線，咪以為佢得把口，之前對住土耳其都冇留手，就算今仗畀新星馬里奧葛斯免役，但抽調番啱啱踢完U21嘅多蒙特中場根度簡頂上，再加埋卻奧斯同奧斯爾都落得番場，質素有保證。雖則前線馬里奧高美斯可能先任後備，但頂上嘅老將高路斯咪一樣堅料，以佢哋今屆分組賽9戰入31球，平均每場入3.44球嘅威力，使驚冇波入？


比利時中堅雲拜頓停賽


比利時近年再成功孕育黃金新一代，唔少骨幹成員都外流咗去歐洲頂級聯賽搵食。由於同組對手土耳其最後一輪只係對住已經出局嘅阿塞拜疆，幾乎穩執3分，換句話講，比利時呢鋪失分就唔掂，焗住搶攻，遇啱拜仁中堅雲拜頓要停賽，防線不穩隨時失波。 歐國外A組


歐國盃外圍賽賽制：


若同分以對賽成績定名次，每組首名及9組中最佳成績次名，可出線由波蘭及烏克蘭合辦嘅決賽周，餘下8組次名進行兩回合附加賽，決定另外4個出線席位。