歐國盃最後搏拳

猪拉多纳

11/10/2011
文： 巨高

唔經唔覺，歐洲國家盃外圍賽又進入尾聲，今晚會上演最後一輪外圍賽，除咗德國、荷蘭、英格蘭、意大利及西班牙五支球隊確定出線外，其餘球隊今晚仲要繼續努力，爭逐明年夏天波蘭及烏克蘭決賽周嘅入場券，其中丹麥對葡萄牙、法國對波斯尼亞肯定最受矚目，鹿死誰手今晚就會分曉！


丹麥葡軍爭首名大哂冷


歐洲國家盃H組外圍賽，最後一輪矚目大戰為丹麥主場對葡萄牙，兩支前列球隊同得十六分，雙方都要為爭直接出線明年歐國盃主賽圈而努力。基於現時出線形勢緊湊兼且可能性極多，故今場兩隊都會搏盡求勝，料雙方都唔會作任何保留，大盤可高度留意。（now 631及有線155台周三凌晨2時15分直播）


葡萄牙作客照攻


簡單交代形勢，葡萄牙曾於主場三比一擊敗丹麥，今場只要唔輸畀丹麥就一定以小組首名出線。至於丹麥則較為微妙，如成功擊敗葡萄牙就會上榜首。如果打和的話都有望以最佳次名打入決賽圈，不過要視乎其他組別賽果而定，可能仍要踢附加賽。喺不明朗因素之下，丹麥肯定會全力搶攻求贏波三分。




對手葡萄牙亦唔例外，縱然和波都可首名出線，但以球隊風格一定唔會打守勢波，尤其C朗、拿尼、摩天奴等等全部近期當弗，葡軍外圍賽七場入二十球，今仗要取入球唔難。最重要係葡萄牙領隊保羅賓度公開講明，作客丹麥唔會縮後死守求一分咁衰仔，誓必以勝利確保首名資格。既然兩隊都冇保留去到盡，今場想唔開大都幾難。