阿曼飛行恐懼症 澳洲讓球勝食住上

猪拉多纳

11/10/2011
文： 巨高

除中國迎戰伊拉克外，今日尚有其他世界盃亞洲區外圍賽舉行，其中D組榜首球隊澳洲將主場對阿曼。經過兩輪分組賽之後，澳洲兩出兩捷以六分排榜首，實力有幾強毋須多講。面對世界排名過百位嘅魚腩阿曼，相信澳洲可憑主場之利狂勝對手，「讓球主勝」有1.7倍可放心捧場。




（周二下午4時30分開賽）




澳洲為爭取世盃決賽周席位而加入亞洲區，可見佢哋對世盃有幾重視。縱然對手只係阿曼，但澳洲領隊照樣點選強陣迎敵，單睇牌面已贏過阿曼。另一個優勢係澳洲屬亞洲足協成員內其中一個南半球國家，身處中東嘅阿曼要搭長途機飛去澳洲比賽，球員舟車勞頓之餘又要適應時差，體力及精神狀態都輸蝕。


訪泰國都吞三蛋


有一點要留意，絕大多數阿曼國腳都喺中東球隊効力，唔似得歐陸球員搭慣長途機四圍去比賽，長途機程必對阿曼球員身體機能造成嚴重影響。唔好講咁遠，阿曼上一輪近近哋飛去泰國都淨吞三隻光蛋，今次對住實力高幾班嘅澳洲，你話阿曼點會頂得住，澳洲今場大炒格。


南韓大起阿聯酋


另一場由南韓主場對阿聯酋，大盤可多加留意。南韓足球水平於亞洲可謂數一數二，對住亞洲二線球隊阿聯酋應該冇難度，可博南韓贏波兼開大。