碧根鮑華：漢堡靠巫師打救

猪拉多纳

23/09/2011


經過頭六場聯賽只得一分後，包尾嘅漢堡終於忍無可忍，喺星期一怒炒教練奧寧，暫時由助教魯多科卡度素出任看守教練，球隊正努力物色新帥，不過多位名帥都耍手擰頭，目前呼聲最高嘅係○七年曾經救過佢哋一次嘅史堤芬斯，同埋荷蘭前傳奇球星雲巴士頓。




今仗帶領漢堡出師嘅魯多科卡度素只係替工性質，體育主管阿連臣想搵名牌執教，但正執教馬略卡嘅傳奇球星米高盧特立，同埋正執教丹麥國家隊嘅奧臣都已拒絕跳槽。阿連臣正力邀史堤芬斯同喺阿積士時代同佢關係密切嘅雲巴士頓出山。




不過，拜仁總裁「足球皇帝」碧根鮑華就對漢堡潑冷水，佢話以漢堡目前嘅人腳同財政狀態，除咗搵巫師之外，無論搵邊個都好難救得番喎！


蘭歷克辭史浩克教職


此外，史浩克04官網昨日突然宣布，教練蘭歷克以健康理由辭職，明晚主場對弗賴堡之戰，助教艾希科恩再次擔任看守教練；上季史浩克解僱馬加夫時，艾希科恩就曾經做過一場臨時工。