葉士域治「地」頭搶W

猪拉多纳

19/09/2011
文： 朱楓

葉士域治同高雲地利呢對「難兄難弟」，今晚會喺英冠獨腳戲交鋒。兩軍狀態都唔多好，不過葉士域治啱啱搞掂單拖咗好耐嘅官司，終於可以專心比賽，對住正選門將可能缺陣嘅高雲地利，贏面稍高一線，朱楓撐1.95倍主W！（now638台周二凌晨2:45直播）


高雲地利正選門神打柴


今年暑假，葉士域治簽咗件守將艾朗加斯威爾，呢位英格蘭小將之前踢燦美爾，佢同母會約滿後先加盟葉士域治，按道理應該冇乜好拗。點知燦美爾以球員未夠24歲為由，要求葉士域治畀「培養費」，呢單嘢搞足成個夏天，日前當地體育法庭終於宣判葉士域治敗訴，要向燦美爾賠償24萬鎊，之後或再追加4萬鎊，條數都唔算好大。點都好，領隊祖維爾話雖然要賠錢好唔忿氣，不過就為單官司告一段落而興奮，佢又話班球員家陣可以專心作戰，未嘗唔係一件好事。




講真，葉士域治之前大敗畀彼德堡1:7，的確令人擔心，但之後佢哋喺主場即刻以2:1反勝列斯聯，可見呢班波喺地頭出戰有鬥心又醒神；相反，高雲地利上周先以2:0擊敗打比郡，結束5戰不勝頹勢，衰在比賽期間正選門將祖梅菲傷出，今戰上陣成疑，一眾後備都冇乜落場經驗，你話點捧得落手先？