利華萊茵河打吡一條隆

猪拉多纳

17/09/2011
文： 蘇斯黑柴

德甲早場直播上演萊茵河打吡，利華古遜主場迎戰科隆，利華啱啱作客倫敦踢完歐聯，教練杜特決定喺今仗作出大輪換，不過球隊實力、狀態同往績都遠勝對手，今仗1.32倍主Ｗ可視為過關重心，玩單頭1.95倍「讓球主勝」都有得諗。




（有線61及64台周六晚9時30分直播）




利華古遜四日前至作客倫敦，力拚勁旅車路士，最終輸○比二但表現已算唔曳，由於征戰頻密，今仗決定作出輪換，上仗正選嘅守將奧馬托柏克、卡特歷、中場波歷克、悉尼森姆同箭頭傑斯寧將會輪休，不過佢哋勝在人多，文奴費特列治、巴列殊、連拿度奧古士圖同戴迪約克將會頂上。


比拿拉比處子登場


此外，教練杜特仲準備起用被寄予厚望嘅德國U21翼鋒比拿拉比首次喺德甲亮相，雖然換咗咁多人，但整體實力影響唔算大，反而可以減輕球員體力負擔，球隊近四場聯賽三勝一和狀態當勇，今晚主場迎接打吡戰，當然有強烈爭勝欲望。




科隆今季由挪威教頭蘇巴根接手，佢上任後即罷免咗「王子」普多斯基嘅隊長職務，改由中堅柏度基洛美擔任，搞到兩面唔討好，普多斯基當堂冇晒癮，至今五場聯賽只入一球，而柏度基洛美又壓力太大，上仗對紐倫堡竟然喺五分鐘內於禁區內兩犯極刑，搞到主場輸波。


科隆往績輸條街


科隆今季五戰只一勝，仲要係兩度落後下至反勝目前包尾嘅漢堡，表現令人失望。何況科隆過去喺萊茵河打吡往績極差，近9次對利華古遜輸咗7場，近9次作客1和8負，其中6場輸兩球或以上，相信今晚都無力打破往績上嘅不利數據咯。