初哥打吡曼城踢好「玻」

猪拉多纳

14/09/2011
文： 力奇

曼城、拿玻里今屆齊享歐聯初體驗，偏偏就抽中落死亡A組，仲要首戰即刻狹路相逢！不過，「藍月亮」曼城係非一般歐聯初哥，陣內無論領隊定主將都有豐富大賽經驗，加埋地利同上佳狀態，今晚絕對唔難大炒拿玻里打響頭炮，呢場「初哥打吡」我捧曼城1.97倍「讓球主勝」。（有線64、204及中央5台周四凌晨2:45直播）


曼城雙箭狂入波


月到中秋分外明，外號「藍月亮」嘅曼城嚟到中秋前後，狀態亦都推上高峰，英超開咧4戰全勝，除作客保頓係險勝3:2外，其餘3場都係大勝對手開出「讓球勝」，總得失球仲去到15:3添，認真犀利。球隊火力驚人，新兵阿古路已完全融入球隊，貴價貨迪斯高今季終於發揮水準，兩人喺聯賽各入6球，唔好唔記得，後備席仲有個泰維斯Stand-by，就算話巴洛迪利停賽，想入波，都係要幾多有幾多啦！




曾經喺68/69年球季踢過歐冠嘅曼城，話就話係喺新制歐聯首度登場，但要知道佢哋主帥文仙尼球員時代踢過歐冠決賽，做領隊後亦帶過拉素同國米參賽。此外，陣中嘅泰維斯同耶耶托尼都曾經幫曼聯、巴塞贏過歐聯，講經驗，絕對喺拿玻里之上。


拿玻里人腳參差


拿玻里方面，喺球王馬納當拿年代梗係巴閉，但之後浮浮沉沉，直到上季先叫打番爭氣波，攞到個意甲第3。球隊人腳唔算太差，前線卡雲尼、拿維斯同中場咸錫都係好波之人，衰在踢嚟踢去都係呢幾個，其餘球員級數普通。仲有，佢哋歷來3次作客英格蘭都係輸波而歸，今仗真係咪寄望太高。