執二攤 唔夠班 特拉布宗難抗國米

猪拉多纳

14/09/2011
文： 麥馬拿仁

歐聯B組「超級魚腩」出場，特拉布宗「名不正、言不順」，去到聖西路輸少當贏！今晚特軍作客國際米蘭，呢班波因為費倫巴治涉打假波，因而有機頂上初入歐聯分組賽，但佢哋新埋班毫無默契，又有主力停賽，國米「讓球主勝」好路。




（周四凌晨2時45分開賽）




特拉布宗去季奪土超亞軍，球隊於本屆歐聯第三圈外圍賽不敵賓菲加出局，但由於費倫巴治涉嫌造假被取消參賽資格，特軍先有機會頂上。




其實球隊今夏都使唔少錢買人，好似斯洛伐克前鋒維迪、前西維爾中場索高拿，以及前法蘭克福鋒將哈利艾天托普等，但佢哋高峰期已過，再加上新人太多，球員間未有默契，預期各有各打情況嚴重。此外，兩大進攻主力爾馬斯及美亞錫祖斯基都停賽，特拉布宗實力曳上加曳，根本未夠班同國米抗衡。


國米聯賽輸波要出氣


國米於意甲開咧戰落筆打三更，作客三比四輸畀巴勒莫。新帥加斯柏連尼引入「343」全攻型陣式，影響球員發揮，今仗加帥肯定會作出調整，迪亞高米列圖腳風甚順，今仗會將特拉布宗練靶咁練。