阿仙奴騰騰震易畀蜜蜂針

猪拉多纳

13/09/2011
文： 力奇

等足9年終於重返歐聯賽場嘅德甲勁旅多蒙特，今晚喺F組主場迎戰阿仙奴。「兵工廠」經歷季初內部混亂，大執位後根本仲未復原，加埋領隊雲格停賽，作客盞畀「蜜蜂」針死，今場我捧1.9倍主勝！（有線64及204周三凌晨2:45直播）


上季重拾勁旅本色勇奪德甲冠軍嘅「蜜蜂兵團」，今夏人腳變動唔大，就只係放走咗中場新星紐尼沙軒，但整體實力依然，唯一要挑剔係巴拉圭射手巴里奧斯仲養緊傷，不過頂上嘅波蘭仔羅拔利雲度夫斯基把握力其實一樣唔差。

多蒙特馬里奧葛斯復出

冇錯，佢哋今季喺德甲5戰只得2勝1和2負，但睇番上周末不敵哈化柏林場波，即使馬里奧葛斯停賽，依然有超過6成控球權，射門次數更多過對手一倍幾達到25次，若非冇運同哈化門將表現出色，根本冇可能失分，今仗有馬里奧葛斯復出，相信多蒙特會重現真身。


另邊廂，阿仙奴今夏放走兩大中場核心法比加斯同拿斯尼，就算即刻補入番阿迪達同班拿約，力奇認為莫講話質素差一截，培養默契都要時間，佢哋早前打硬仗輸畀曼聯2:8，球員根本冇晒信心，上仗贏史雲斯都只係多得對手送大禮，就算今仗會有謝雲奴同桑治復出，嗰件新兵梅迪薩卡又熟知德國球隊波路，但都係咪寄望太多。