比甲魚腩冇前冇後 亨克做硬蝙蝠點心

猪拉多纳

13/09/2011
文： 麥馬拿仁

歐聯E組外圍賽，比利時冠軍亨克主場對「蝙蝠兵團」華倫西亞，揀客勝。亨克殺入分組賽已經還得神落，呢班波冇星味打整體，於國內就話也文也武，但根本出唔到大場面，教練比連最叻只教過奈梅亨，就算有主場之利都分分鐘腳軟！


（有線63、203台周三凌晨2時45分直播）


亨克歷史上攞過三次比利時頂級聯賽冠軍，於名氣上唔係安德列治嗰皮。本季於外圍賽抽得好籤，先淘汰柏迪遜，於附加賽遇上海法馬卡比，首回合作客以色列都輸一比二，之後返主場先射贏十二碼晉級，睇到球隊實力只屬有限公司。


亨克陣中球員名不見經傳，隊長係中場大衞胡拔，佢只有廿三歲，到今年先首次入選比利時國家隊。而前鋒禾臣同以色列箭頭巴達，亦都只係邊緣國腳，如此鋒線點見得人？最慘係後防不濟，巴西中堅尼特臣以甩漏多見稱，上仗比甲作客聖圖以登，亨克都失三粒。


今年八月，亨克教頭華古達倫離隊，前奈梅亨荷蘭籍主帥比連走馬上任，佢經驗少又未摸熟隊波，面對大勇華倫西亞輸少當贏。