烏茲別克場地曳日本難組織攻「細」

猪拉多纳

06/09/2011


由於要提防「塔什干之笛」，日本今日响世界盃外圍賽亞洲區第3圈C組賽事作客烏茲別克，雖然會改排「343」攻擊陣式，但想贏都唔容易，都係博1.52倍入球細划算啲。（開賽時間：周二晚10:00）




日本同烏茲別克都首戰報捷，今場邊隊贏波就會响C組彈出帶頭，所以兩隊都咬牙切齒要贏波。日本因為本田圭佑、中村憲剛傷咗，遠藤保仁狀態亦麻麻，領隊沙哲朗尼惟有兵行險着，將上仗北韓排嘅「451」改成「343」，佢希望派香川真司做影子前鋒，用強大鋒力嚟減輕後防壓力，所以咪以為佢咁排陣法就係博大炒，實質係怕後防頂唔順啫。


球證偏幫主隊有前科


其實日本嘅不利因素唔少，坐成11粒鐘長途機去塔什干，已經全班人謝晒，而且09年6月6號世盃亞洲區10強賽嘅時候，佢哋作客塔什干就畀個球證吹到唔識踢，大久保嘉人入波食詐胡，長谷部誠同當時嘅領隊岡田武史食紅牌，要幾經辛苦至贏烏茲別克一粒。




幾年過後，日本實力升咗呢，但佢哋頂唔頂得住「塔什干之笛」，連香川都有啲擔心，何況烏茲別克上場作客小勝塔吉克1:0，個中場大腦迪積佩洛夫踢咗68分鐘就收兵，加埋前面嗰件老將沙斯基克仲未退化得晒，而且比賽場地唔只草長，仲到處有窿，不利傳送配合，日本應該好難炒得起主隊，唔好彩嘅話波都未必入到。




世盃亞洲區外圍賽C組