巴西小兵請你歎「葡萄」

猪拉多纳

20/08/2011
文： 牛奶仔

聽朝世青盃決賽，由巴西同葡萄牙爭奪冠軍寶座。巴西上仗提早收起兩名中前場主力，留力應付冠軍戰；相反葡萄牙則接近全場捱打，球員體能消耗大，此消彼長，一於捧「森巴小兵」第5度捧盃，要1.65倍主勝。（開賽時間：周日早上9:00）


射手漢歷基爭金靴獎


4屆冠軍嘅巴西上屆喺決賽互射12碼不敵加納，今次再度殺入決賽，當然唔想再臨尾香。巴西喺4強戰憑住聖保羅前鋒漢歷基艾美達梅開二度，以2:0淘汰墨西哥晉級，此子今屆賽事已經取得5球進帳，同時亦交出3次助攻，依家排喺神射手榜首位，相信今仗定必搏命爭取入波率領巴西捧盃，順手攞埋金靴獎。




事實上，巴西領隊尼爾法蘭高上仗領先後，就早早收起菲臘比古天奴同威廉荷西2名中前場球員，等佢哋留番啲體力今仗搏殺，擺到明想重奪失落8年嘅冠軍！


葡萄牙火力弱輸體能


另邊廂嘅葡萄牙今屆表現大躍進，亦係繼95年摘季後首次突破16強階段，今次能夠殺入決賽可以話已經超額完成。佢哋上仗雖以2:0擊敗法國，但查實全場佔唔到優勢，控球權4成都唔到，射門亦比對手少13次，贏波或多或少純粹靠運氣。再者，葡萄牙今屆場均入波唔到1球，相反巴西就有2球多，火力唔夠、體能又輸蝕，睇怕都係稱臣居多。




賽制：世青盃決賽採一場決勝制，若法定時間打成平手，需加時30分鐘，再和則互射12碼分勝負。