利物浦趁火打劫

猪拉多纳

20/08/2011
文： 樂比堅尼

英超第二周上演今季首場Big4大戰，阿仙奴主場迎戰利物浦。「兵工廠」近期傳出嘅不利消息一單接一單：主力離隊、增兵遇阻滯、傷停問題，歐聯後顧，件件都係大單嘢，今仗對來勢洶洶嘅紅軍仲要讓平半，實在好難搵到支持兵工廠理由，樂比仔捧下盤。（有線300及200台周六晚7時45分直播）




未分析今場波前，先講吓阿仙奴傷停情況，桑治同謝雲奴停賽，韋舒亞、戴亞比、基蘭基比斯、阿曼特查奧爾、佐羅同路斯基都有唔同程度傷勢，上陣機會唔樂觀，加埋法比加斯、伊保爾離隊，拿斯尼亦即將鬆人，阿仙奴人腳可謂嚴重不整，部分小將如宮市亮、費林邦及贊堅臣，今仗均有機會登場。


傷停嚴重 後顧歐聯


樂比仔從來唔會睇低阿仙奴後備軍實力，但兵工廠目前面對嘅唔單止係兵源調動問題，而係信心問題，尤其係英超開鑼首周即被紐卡素悶和，周中歐聯面對星散嘅烏甸尼斯亦僅以一球小勝，究竟雲格是否需要留力，打幾日後關乎數千萬鎊收益嘅歐聯大戰，實在令佢相當頭痛。




即使唔講阿仙奴負面消息，利物浦今季亦令人相當期待，雖然佢哋喺開鑼戰主場僅與新特蘭打成一比一，但佢哋上半場表現確實唔錯，新兵查理阿當亦踢得好搶鏡。




紅軍今季最大優勢係唔使踢歐洲賽，有成個星期準備今場硬仗，反觀阿仙奴頻頻撲撲，又要面對咁多場外問題，樂比仔相信紅軍兩名箭頭安祖卡路爾及蘇亞雷斯今仗可衝擊兵工廠防線！