東京中場「大腦」打岡山

猪拉多纳

29/06/2011
文： 走肖

呢期日乙邊隊最旺？答案梗係FC東京啦！近期佢哋傷兵問題一好轉即刻強勢反彈，特別係中場「大腦」石川直宏「完全復調」，上場射入傷愈後首個入球，今場作客岡山綠雉好可能踢番正選，有佢幫手1.52倍客W要添食。（開賽時間：周三晚6:30）




FC東京降班後保留大部分主力，諗住以日乙史上最強班底爭升班，點知未開季就受到嚴重傷兵問題困擾，一度淪落榜尾，不過唔使驚，傷兵問題已經開始好轉，近5場即刻取得4勝1和，日前作客以3:2贏水戶蜀葵，連續4場後備上陣嘅石川直宏更加射入靚波，消息話今場佢會重返正選陣容搏殺，贏面更加大。


岡山首席射手停賽


雖然東京仲有前鋒平山相太、高松大樹、中場米本拓司同羅拔圖未好番，但為咗爭升班，高層已落實簽入上季踢大阪飛腳嘅盧卡斯施維連奴補充火力，等佢操起狀態兩個星期後就踢得。對家岡山綠雉有今季入6球嘅食胡射手堤亞高停賽，就算中堅史杜恩諾夫坐完波監復出，都唔似扭轉到3連敗厄運。