強捧仙台1.77倍Ｗ

港陌

21/06/2011
文： 蘇豪

歌仔都有得唱，受過傷先知道要堅強！日本今年三月經歷大地震災難後，身處重災區嘅仙台維加泰，卻展現出不死精神！聯賽十一戰保持不敗，係日職目前唯一不敗之師，香港時間明日下午主場迎戰甲府風林，蘇豪捧1.77倍主W！


（now 633周三下午1時直播）


上季僅護級成功嘅仙台維加泰，今季被視為下游分子，但季初表現卻令球評家大跌眼鏡，大軍攻守兼備，前面有赤嶺真吾爭取入球，中後場則有菅井直樹壓陣，雖然冇名牌外援助陣，但卻以整體踢法打出名堂，計埋聯賽同盃賽已十二場未輸過，陣營士氣如虹，決心要爭取來季亞冠盃資格，未斷之前都值得繼續追！


事實上，仙台維加泰今季打得咁好，主要係球員夠團結，正如新進國腳關口訓充表示，依家球員操練時都分外起勁，希望可爭取好成績送畀災民，而球隊今季主場表現確實特別好，上次主場面對大阪飛腳憑赤嶺真吾完場前建功贏二比一，計埋上仗逼和新潟天鵝，仙台已經連續兩場喺比賽末段入波，可見呢隊波幾咁有毅力！

甲府風林忽龍忽蟲

甲府風林今季表現忽龍忽蟲，贏到鹿島鹿角、名古屋鯨魚等名牌球隊，但對住中下游球隊卻冇料到，呢隊波最大問題係防線甩漏甚多，今季十一場聯賽僅得一場保持清白之身，兩名巴西外援保連奴同丹尼爾施華質素平庸，其中保連奴作為前鋒仲未開齋，實在難以交代，仙台維加泰乘勇可再下一城！