牙買加分組全勝入８強

魑魅魍魉

15/06/2011


美洲金盃B組最後一輪分組賽，牙買加憑一記幸運入球以一比○擊敗洪都拉斯，保持三戰全勝兼不失球佳績，以小組首名強勢打入八強。洪都拉斯雖然輸波，但仍能與同日贏波嘅危地馬拉攜手出線。




牙買加前鋒賴恩莊遜於上半場三十六分鐘離門二十八碼起腳，皮球中楣彈出，卻剛好打中洪都拉斯門將華拉達利斯「後尾枕」反彈入網，牙買加就係憑呢個幸運入球全取三分。下半場曾經射失十二碼嘅賴恩莊遜賽後表示：「呢個係一個奇怪入球，但入球就係入球，最開心係我哋三場都冇失波。」牙買加八強對手會係C組次名，照目前情況好大機會係主辦國美國。


洪都拉斯輸波照晉級


洪都拉斯雖然輸波，但仍以小組次名出線，八強遇上哥斯達黎加。同組危地馬拉大勝格林納達四比○，肯定成為兩支最佳第三名之一，亦成功取得八強資格。