洪都拉斯大晒冷

猪拉多纳

06/06/2011
文： Mic少

美洲金盃B組賽事明早展開，洪都拉斯對危地馬拉，上屆四強分子洪都拉斯星味十足，擁有三位英超球員助陣，包括熱刺中場柏拉西奧斯、韋根雙子美羅費古羅亞及亨特利湯馬士，但球隊近期於熱身賽表現欠佳，防線尤其不穩，洪軍主勝乏味，寧捧入球大。 （周二早上11時開賽）




洪都拉斯上屆打入四強，亦有份參加去年南非世界盃決賽周，其級數於中北美洲僅次於墨西哥及美國。洪都拉斯有唔少球員於歐洲主要聯賽立足，除上述英超三寶之外，仲有些路迪後衞伊薩古利及列斯聯中場雷蒙紐尼斯。洪都拉斯有呢批優質球員助陣，入波唔成問題，但佢哋近三仗國際賽共失九球，今仗被危地馬拉偷雞入到波都唔奇。




危地馬拉上屆冇份參賽，○七年則打入八強，陣中孭飛球員係効力美職費城聯嘅前鋒卡路士雷斯，佢今季聯賽已有三球進帳，加上効力芝加哥火燄嘅中場馬高柏巴亦攻入四球，兩人有能力為危地馬拉破蛋。


牙買加炒「格」


另一場B組賽事，牙買加對格林納達，牙買加亦有唔少球員喺美國搵食，今次大軍名單有近三分一人効力美職球隊，話牙買加有半個主場絕不為過。格林納達上屆分組賽三戰全敗出局，成為三零部隊，未夠班喺呢項賽事爆冷，捧牙買加「讓球主勝」。 （周二早上9時開賽）