些路迪搏命爭盃報答連儂

港陌

21/05/2011
文： 亨格比利

眼白白睇住死對頭格拉斯哥流浪封王，連續3季失落蘇超錦標嘅些路迪，今季梗係唔想兩手空空啦！今晚蘇格蘭足總盃決賽，呢支蘇超班霸勢要大炒沉到爆嘅馬瑟韋爾攞尾彩，捧1.83倍「讓客」。（開賽時間：周六晚10:00）




今仗喺中立場咸普頓公園球場舉行，蘇格蘭警方賽前仲實施禁酒令，以免有球迷醉酒搞事，氣氛幾緊張吓。講番場波，些路迪今季以1分之差失落聯賽錦標，領隊連儂由買人以至戰術問題都畀唔少球評家質疑，仲收過多次死亡恐嚇添，壓力認真唔細。


馬瑟韋爾近5戰不勝


些路迪隊長史葛布朗賽前表示，爭標失敗球員都有責任，但連儂就做咗佢哋嘅人肉擋箭牌，所以全隊上下都已經講到明，要搏埋條老命幫連儂贏盃，戰意絕對一流。




對家馬瑟韋爾喺煞科戰勁吞些路迪4蛋，呢場波領隊麥哥派咗大量副選，分明想留力應付今場大戰。之不過馬瑟韋爾踏入季尾愈踢愈沉，計埋煞科戰留力，近5場聯賽錄得2和3負勁失17球，要知道些路迪前鋒加利賀柏近期着晒火，馬瑟韋爾條防線咁豆腐點頂呀？


近5屆蘇總決賽


球季 戰果




09/10 登地聯 3:0 羅斯郡

08/09 格拉斯哥流浪 1:0 福爾柯克

07/08 格拉斯哥流浪 3:2 南部皇后

06/07 些路迪 1:0 鄧弗姆林

05/06 赫斯 1:1* 基特拿

註：*赫斯12碼贏4:2

蘇總、德盃賽制

今戰為決賽，以一場過決勝負，若法定時間打和就要加時30分鐘，假如仍未能分出勝負，即互射12碼決定冠軍。