熱刺哈利仔 搣柴有禮修

猪拉多纳

（六）16 修咸頓 Vs 熱刺

今晚英超早場上演歐霸席位前哨戰，「七哥」修咸頓主場硬撼排第6嘅熱刺。熱刺隊長兼門神洛里斯今仗有機會復出把關，超新星哈利卡尼「搣柴」後重拾射門鞋，況且近年對賽剋住修咸頓，為保第6位嘅歐霸入場券必定搏盡，仲有得受讓梗係捧讓球客勝。

（now 621周六晚7時45分直播）

熱刺超新星哈利卡尼今季好似坐火箭咁一飛沖天，唔單止以20球喺射手榜拍住曼城王牌阿古路並列第1，首次為英格蘭國家隊披甲即有士哥，近期因隊長洛里斯受傷，升呢做埋「喼噸」，可能係壓力大關係，嗰兩場波不勝兼冇波入，好彩上仗對紐卡素改由維頓漢做隊長，哈利卡尼「搣柴」後即有士哥，今仗洛里斯有望復出把關，令防線更添穩健。
往績食住修咸頓

另一邊廂，修咸頓除咗門神費沙科士打因傷提早收咧外，勇悍防中雲耶馬要繼續停賽，實力受削。由於英超第7位能否佔據來屆歐霸一個席位，先決條件係要阿仙奴擊敗維拉奪足總盃，唔排除維拉會爆冷捧盃，因此熱刺若想踢歐霸，最好方法係保住「六哥」，主帥普捷天奴之前執教修咸頓熟晒路，加上近五次交手熱刺贏晒，擺明格食格，讓球主客和仲受讓一球，力撐熱刺讓球客勝。