尼馬收爐巴塞實出「真」功夫

猪拉多纳

今季喺主場已經造出10連勝佳績嘅西甲班霸巴塞隆拿，聽朝喺西班牙盃第4圈次回合返嚟魯營迎戰丙組仔卡達真拿，咪以為佢哋首回合咧住4:1就會肯收手，查實今仗極有可能係「地上最強」最當時得令前鋒尼馬喺2013年嘅收爐戰，試問又點會留力贏得少吖！巴塞今場讓3球，力奇大膽照捧1.95倍「讓主」！

（now632台周三清晨5:00直播）

巴塞首回合作客冇尼馬同美斯，仲出咗幾件小將，結果先失1球下照炒4:1，兩班波質素差幾多根本毋須力奇多講。嚟到次回合巴塞主場，晉級根本冇疑問，唯一要諗係佢哋會出咩人，同今場贏幾多粒？冇錯，美斯繼續長抖，沙維右腳肌肉拉傷，會同埋域陀華迪斯、碧基及布斯基斯一齊休戰，但照估計上仗贏維拉利爾做後備嘅基斯甸泰路同馬斯真蘭奴，以至踢得幾分鐘嘅柏度洛迪古斯都會擔正，整體實力依然有保證。
丙組仔卡達真拿等做炮灰

更令力奇對佢哋投下信心一票，係因為已經交出10入波10助攻嘅「雙雙殺手」尼馬，由於會喺之後周一凌晨作客基達菲嘅西甲停賽，如果巴塞最後唔提上訴，即係話今仗就會係呢位巴西球王喺2013年嘅收爐戰，梗係要做番齣好戲當聖誕禮物送畀Fans啦。

卡達真拿呢邊，佢哋係丙組第4位球隊，喺聯賽近4戰就只得1勝2和1負，狀態已經麻麻。而且嚟到魯營呢個足球聖殿比賽，班人唔嚇到腳軟就有鬼，今鋪都係等做炮灰啦！