金鎗俠轉場減磅 陳家樑有憧憬

猪拉多纳

告廐「金鎗俠」季內已熱身一仗，馬主陳家樑寄望愛駒能取得突破。他說：「『金鎗俠』出自上年3月香港國際馬匹拍賣會，以350萬港元投得。呢匹美國4歲馬比較慢熱，但上季頭一季上陣，三番四次能夠跑入前列，證明質素唔係太差，鬥心亦頗強，當然走姿較為稚嫩，要再畀時間慢慢調教。抖暑期間，告達理落咗好多心機打磨，上月底一課800米草地大閘，馬匹沿途按實輕鬆跑入第4名，進步明顯，負責出試嘅安國倫亦大加讚好；因此，沙田開鑼日出戰四班1200米，原本對爭勝抱有很大期望，奈何馬匹受制於慢步速，沿途走來欠順，最終只跑得第9名。告達理今次安排『金鎗俠』轉場出擊，並改用呂卓賢孭輕7磅，希望藉此尋求突破，勝回一仗。」